以前美國多神話，而家多笑話！

　　嚴肅嘅地方，竟有如此攪笑嘅真人真事。

　　“Disorder in the American Courts”「美國法庭記趣」一書中，記載了以下騎呢對答：

　　律師：最細個仔，呢！廿歲嗰個，幾多歲？

　　證人：廿歲，好似你嘅IQ咁！

 ***   ***   ***

　　律師：呢幅係你嘅相，影相時你是否在場？

　　證人：你講笑呀？

 ***   ***   ***

　　律師：佢有三個細路，係咪？

　　被告：係。

　　律師：有幾多個係仔？

　　被告：冇。

　　律師：有冇女呢？

　　被告：法官大人，我諗我要換律師！

 ***   ***   ***

　　律師：嗱！醫生，一個人喺睡夢中死亡，佢第二日先知道自己死咗，係咪？

　　證人：你點畢業㗎？

 ***   ***   ***

　　律師：醫生，你驗屍前有冇檢查佢嘅血壓？

　　證人：冇。

　　律師：你有冇檢查佢呼吸。

　　證人：冇。

　　律師：咁，病人有冇可能喺你開始驗屍時仲未死呢？

　　證人：冇。

　　律師：醫生，你點可以咁肯定呢？

　　證人：因為佢個腦裝咗喺我枱面嘅玻璃罌入面。

　　律師：但佢有冇可能仲未死呢？

　　證人：有，佢可能未死，而且做緊律師！

 ***   ***   ***

　　本以為跑法庭呢條線嘅記者一定悶到抽筋，原來有時笑到抽筋！