《魚缸博客》美債風暴又來臨，十月加息機會又再爆燈？

　　《魚缸博客》昨晚大家係咪都訓得好好？博客昨晚唔係幾咁訓得著，因為美股個邊幾樣嘢同時殺埋身，成晚就係咁Mon住個市，個心肝仔係咁跳上跳落。

　　昨晚公布嘅美國9月綜合PMI初值，大幅超預期，創五年新高。新訂單擴張速度係2022年4月以來最快，製造業招聘力度係2021年2月以來峰值，企業投入成本指數係2022年10月以來最高。呢個數據一出來，市場即刻重新定價，經濟咁勁，通脹點會咁快落？聯儲局點會停手？

　　同日，伊朗總統喺聯合國大會發言，表明唔會接受特朗普嘅「霸凌」，警告只要制裁持續，霍爾木茲海峽唔會完全開放。布倫特原油當日收漲近4%，重上100美元。油價同債息嘅聯動性，近幾個月愈嚟愈明顯。油價升，通脹預期就跟住升；通脹預期升，債息就自然抽高。

　　接住，聯儲局理事Michael Barr喺芝加哥講話，明言「通脹高於2%目標，且未見明顯向目標靠攏嘅趨勢」，並稱「在我的基準情景下，可能需要進一步調整政策」。呢句話嘅份量在於：Barr唔係鷹派代表人物，佢都咁講，即係委員會內部嘅共識正在向「繼續收緊」傾斜。
　　
　　最緊張嚟料啦：當日350億美元嘅5年期國債標售，中標利率5.033%，高於拍賣前預發行收益率5.002%約3.1個基點。認購倍數2.21倍，低於此前六個月平均嘅2.33倍。拍賣需求疲軟，直接觸發收益率突破5%關口，恐懼情緒蔓延。
　　
　　以上四件加埋個結果就係：10年期美債收益率單日飆升約14個基點，收於5.113%，創2007年以來新高。2年期升至4.85%，創2024年底以來新高；30年期收報5.40%，時隔一周又創2007年來新高。期貨市場對10月加息嘅押注，由之前嘅約五成，急升至68%。互換市場更已完全消化未來一年內三次25基點加息嘅預期。

　　點解市場咁緊張？因為呢個係一個惡性循環嘅起點。

　　基本原理就係：油價升→通脹預期升→債息抽高→借貸成本增→經濟放緩風險增。而聯儲局嘅態度係：我唔會因為經濟放緩就停手，除非通脹明確回落。摩根士丹利嘅Seth Carpenter就指出，呢次加息更似係一次「政策微調」，而非開啟全新緊縮周期。佢認為市場可能高估咗後續加息幅度，因為沃什嘅政策核心在於「資產負債表改革」而非單純利率工具。但短期嚟講，市場嘅定價已經行得好前。30年期抵押貸款利率突破7%，私募股權等依賴債務融資嘅領域承壓加劇。財政部嘅國債回購計劃，亦未能有效遏制拋售勢頭。

　　投資者留意乜呢？第一，10月加息概率已經升至68%，距離中期選舉僅剩數日。政治壓力同貨幣政策之間嘅張力，會係未來幾周嘅主要變數。第二，油價走勢係關鍵。如果布油持續企喺100美元以上，通脹預期好難壓落嚟，債息亦都好難回落。第三，聯儲局嘅「數據依賴」策略，意味住每一個經濟數據出爐，市場都會有劇烈反應。波動性會係常態。

　　一句講晒：而家發生緊嘅、講嘅唔係單一事件，而係一個系統性風險嘅形成過程：經濟太熱、油價太高、聯儲局太鷹、債市太脆弱，四樣嘢夾埋一齊，就係「完美風暴」。

《編者按》本欄搜羅即市傳聞，惟消息未經證實，《經濟通》亦不保證內容之準確性。