強國真的強大了，從上而下都對外反撲了，顯示出有中國特色的社會主義的力量，強大了啊，怕什麼沒朋友？咱們中國人自己都有十三億人，整個世界都是我們的人，網絡世界就是我們的世界！全部都是同一把聲音。當然要這樣，不然築起那堵網絡長城圍著自己幹嘛？

　　文革終結四十年，想不到會用這種方式來個復刻版。當年由黨媒《人民日報》頭版刊登「五一六通知」，正式展開所謂「無產階級文化大革命」，造成共國十年亢奮，擁護毛太陽的紅衛兵大肆破壞。如今共國汲取了當年的教訓，變得沒這麼高調了，由黨媒《環球時報》來個微博版「六四通知」，號召網軍炮轟兩個國際品牌李施德林及Lancome，在香港找「支持港毒」的藝人何韻詩當代言人。微博上一片聲討，稱會杯葛相關品牌。Lancome即日發聲明強調何韻詩並非該公司代言人，它們只是與何韻詩在音樂上的合作，在香港舉辦音樂會，「對消費者造成的誤解我們深表歉意」。數小時後更宣布因為「安全因素」決定取消音樂會，希望平息大陸網民怒火。接下來幾日，環球時報意氣風發，稱讚Lancome比李斯德林更快更專業，更傾向照顧內地人市場，因為「內地的市場不知是香港的多少倍」，又指內地民眾已經意識到自己有廣泛市場影響力，「今後會對吃中國飯砸中國鍋的境外藝人和各種力量愈來愈不客氣」。

　　大陸人以政治立場封殺香港藝人，係咪第一次呢？唔係。過去「愛國愛港」分子陳淨心等人在大陸微博告俾全國咁多訓導主任聽，「老師！謝安琪、張敬軒都是支持佔中的藝人，不要讓他們來唱歌！」大陸主辦單位即時斬纜唔俾佢哋到大陸參與活動。類似事件仲有黃安舉報周子瑜、林夕等等。但今次係第一次由黨媒發動，由上而下咁號召網民要國際品牌做「生死抉擇」，黨媒更開宗明義，呢類事件會接踵而來，因為試水溫成功，發現原來咁樣講一講，幾大嘅國際商店都要臣服在中國人腳前，那就完全是一場網絡文革，而且是由《環球時報》主導的一場大龍鳳。

　　共國外長王毅出訪加拿大，對當地記者就中國人權問題提出的質疑高聲叫罵，話中國人權只有中國人最清楚，「你冇去過中國你冇資格出聲」，強調中國發展成全球第二大經濟體，人均GDP升到8000美元，仲將保障人權寫埋入憲法添。嘩！好叻呀，好型呀，大陸啲地下肯定濕晒！

　　有人指出，王毅此舉有違國際外交慣例，我就咁睇，結合Lancome跪低事件，就會發覺原來王毅咁做，係好正常，同《環時》連日舉動一脈相承， 因為共國要向世界各地灌輸「有飽飯食就係有人權，銀包有錢就可以聲大大」嘅中國價值觀。

　　哪怕係最講禮節嘅外交場合？照樣鬧你囉，我係全球第二大經濟體！在經濟上我可以要脅你，什麼軟實力？可以賺錢的嗎？總之我在這刻對你有經濟利益，你就要聽我的。「和平崛起」已是舊論調了，今日我有錢，喜歡發動網軍去攻擊誰人，攻擊哪公司，也都在我掌控之內。

　　咁喺大陸做生意又真係如履薄冰架，佢唔鍾意你，就整壇"Luncum"或者"Lanleave"，然後告你侵權，罰你一億兼趕你出國。喺一個咁文明嘅地方做生意，真係幸福。

　　咁香港呢？誰人曾照顧過我的感受？沒有。一國兩制本應體現喺呢度，香港發生咩事，就香港自己解決。國際企業喺度做生意，點解要顧及另一套制度嘅人放嘅厥詞？幾時到佢哋理？

　　何韻詩發聲明批評Lancome自我閹割，要求法國總公司交代，事件引起國際關注，英國廣播公司昨晚直情搵何韻詩做直播訪問。有人批評何韻詩藉政治撈油水，所以係活該。但何韻詩本人並無喺呢個音樂會上增添政治意味，所謂政治化嘅點解唔係《環時》？

　　文革嘅可怕，係橫蠻嘅一方有國家撐腰。想保持理性嘅人被壓搾，一係你就同佢哋一齊癲，一係你就完全唔好掂政治，想捍衛自身所堅持嘅理念，你就要負上代價。當你越唔想變成好似佢哋咁癲，你付出嘅代價就可能越大。可幸嘅係，我哋仲有一個香港可以守住，可悲嘅係，我哋可以守到幾時？