一般家庭都會在晚餐時，煲一煲老火湯水或在夏天時滖些瓜湯菜湯享用。

　　而韋太就一年365日，每餐晚飯都要有湯水飲才開心，無湯不歡，就算開罐罐頭湯都要有飲湯。

　　夏天天氣太熱，多數會煲瓜菜湯，但韋太家中的少爺仔太麻煩，食多幾件瓜就唔鐘意……

　　韋太唯有將瓜攬爛成茸去煲湯羹，加少少變化小朋友就乖乖地去飲。

　　適逢明天小暑，煲冬瓜去濕湯或羹，都有助消暑解渴。

冬茸海鮮豆腐羹

材料: 4-6人用
　　冬瓜1000克、急凍海蝦150克、急凍帶子150克、急凍蟹柳3條、豆腐1磚/1盒、蛋白 2隻、薑 2片、雞湯1200 毫升

調味料：胡椒粉適量、鹽適量

獻漿水：馬蹄粉60克、清水1/2量杯 (預先拌勻)

做法:

　　1. 將所有海鮮材料解凍後切粒，然後汆水，過冷河瀝水備用。

　　2. 豆腐切粒備用。

　　3. 冬瓜去皮及瓜瓤，沖洗乾淨，刨成幼絲，最後用攪拌機磨成茸。

　　4. 將雞湯煲滾，將冬瓜茸及薑片加入煲滾後，將海鮮料加入煮5分鐘。

　　5. 將豆腐粒加入再煮5分鐘，加入蛋白拌勻成蛋花，最後加入馬蹄粉水煮至稀杰程度即成。

小貼士:

　　1、若果不用雞湯，可以改用清水加入適量的雞粉及鹽去調味。

　　2、冬瓜可以預先蒸軟壓成茸去取代用攬拌機攪爛。