人靠衣著，衣著再不是「著得舒服、斯文大方得體」就可以。不知甚麼時候起，大家暗暗在心底裏，會憑著對方的衣著打扮，去判斷對方的地位和能力。雖然要解釋衣著和能力之間的關係，夾硬講都叫做解釋得到。但職場上，繼「性別歧視」、「年齡歧視」後，開始出現了「外表歧視」一個現象。 

　　「外表歧視」照字面解釋，即是外表較討好的人，更能取得職場人的信任和支持；相反外表較不討好的人，則會在職場上遇到更多的困難。或許很多人會說：「唓！your face your fate吖嘛！由學生時期已經領教過啦！」但成人社會裏的外表歧視，變得更加功利、更加拜金！ 

　　出入中環高級寫字樓，總要著番1、2個名牌上身，才感到安心。女性多著重於手袋或高踭鞋；男性則多著重於手錶或西裝。即是咁，雖然中環白領名義上叫做「最專業、最成功」的一群，但有幾多人真係賺到「買個幾萬蚊嘅袋完全唔痛」嘅收入呢。不過，著得平凡低調嘅人，又唔見得一定是失敗的一群。 

　　有次公司突然來了個姓程訪客。程生從沒和公司合作過，沒有英文名，是個外表40餘歲的阿叔。他身穿殘舊polo、扯布長褲，褲上前後袋都被個人物品塞爆、戴有眼鏡卻不見書卷氣，只見一個個手指模印在鏡片上、一頭黑白混集似是未梳頭的卷髮，總之外表就如一個送貨工人。平時見開大人物的SALES TEAM遇到如此窮酸的客人，自然擺出高高在上的姿態。

 　　「我地嘅客源都係D國際LUXURY品牌，其實你地公司WEBSITE又未有，咩都冇，我好難QUOTE價比你囉！定係貴公司冇諗過整WEBSITE就想搞MARKETING？不如你地公司傾下想要咩先，我地先幫到你架囉。」

　　「大概個價都比唔到我？之前D客大概幾錢，大概比個價我？」

　　「冇病人我地點睇症？點收醫藥費呢？都話我地D客係國際品牌，規模價錢未必可以同你地公司作比較喎。」

　　最終，會議結束，據聞程生頭耷耷地離開會議室。後來，大家發現原來程生是上市公司老闆。一早已唔洗做都唔洗憂，但冇所事事，只好得閒出街開下會，見下人，聽下意見，開拓下新業務。最好你比個數佢，全包，佢乜都唔洗理，你氹得佢掂就得！偏偏白鴿眼SALES TEAM以為人地係小公司、比唔起錢，卻不知人地只係「拎幾百萬錢出黎搵野做下，賺下成功感」。究竟，係你眼中，佢係頭耷耷咁走，定係頭檸檸，覺得你地冇得救咁走？一切在於你內心點睇人，就會得到相應答案。