作為千千萬萬打工仔其中一員，Jenny都知大家最期待嘅就梗係放假！政府今日就公布咗下年（2019年）嘅公眾假期，又係時候砌返個假期攻略，Plan定下年去邊玩啦！（攻略以5天工作、星期六及日休息為基礎）

 長周末都有唔少！黑圈為建議請假日子

2月、10月、12月都可以自製悠長假期

　　假就梗係愈長愈好！下年有3個月份可以請少少假就放成個禮拜以上！包括有2月嘅農曆假可以「請2放9」、10月嘅國慶加重陽可以「請4放10」、12月嘅聖誕新年假可以「請3放8」！Jenny就建議議會嘅民主派，可以到時請個假去返個長Trip！反正而家立法會都改咗議事規則，唔使為拉布輪流係個會「當值」呀嘛！

下年4個長周末 元旦、復活節整個短Trip都唔錯

　　世事豈會盡如人意，Jenny就留意到下年勞動節啱啱好係星期三，兩頭唔到岸，但係當做一個星期入面有個Break都開心嘅！不過仲有個壞消息就係9月嘅中秋節翌日係星期六，大家咁就蝕咗一日喇！

　　下年都有唔少短Trip選擇，例如元旦嘅「請1放4」同埋復活節，小妹仲見到下年唔少假期都撞正星期六、日附近，有成4個長周末都咪話唔爽！包括有清明（星期五）、佛誕翌日（星期一）、端午（星期五）同埋回歸日（星期一）！咁多靚日子，唔知著和服著到出晒名嘅民建聯「大家姐」李慧琼（琼子），下年又有冇打算再去多幾轉日本咁呢？