公務員呢個鐵飯碗「人工高、福利好」，人人爭住做是常識吧!話說2016/17年度共有7790個公務員離任，睇上去好多?其實當中有八成都係夠鐘退休;至於辭職率只係得0﹒63%。雖然個比率好低，不過一眾議員一樣有疑問，好似蔣麗芸(Ann姐)就懷疑係「熱廚房」太熱嚇走人，工聯會何啟明就覺得同冇咗長俸制有關喎！

(設計圖片)

公僕都係打工仔 先講金再講心啦

　　之不過，正所謂「甲之蜜糖，乙之砒霜」，唔講可能大家唔知嗰0﹒63%辭職嘅公務員之中，6成人係在試用期內辭職，認為同份工唔夾有關;有兩成四人嘅理由係婚姻或家庭因素。Ann姐就好質疑辭職者係咪講緊真心話，抑或因為政府是「熱廚房」，工作備受壓力，所以唔Do，要求政府檢視。

　　工聯會何啟明就睇得實際好多，先講金再講心，佢話取消長俸制之後， 公務員辭職率升3倍去到0.6%， 質疑當局係咪可以挽留人才。歌仔就唱:逝去感情如何留得住......Jenny就覺得對廣大打工仔來講，「錢」點都可以留到啲！無論廚房幾「熱」，用加人工呢招，總可以降降體感溫度嘅。

吸引力依然  逾5000人爭一個位

　　公務員事務局局長羅智光(CK)就力撑做公務員仍有吸引力，皆因政務職系招聘嗰陣平均Over 5000人爭一個位。梗係啦!Jenny覺得只係睇近日公布個建議加薪幅度，都已經吸引啦!

　　政府都知唔少人吼住鐵飯碗，今鋪可謂「想市民所想」今個財政年度將會增加6700個公務員位 ，按年增加3.7%咁多。仲配合埋特首林鄭月娥之前喺《施政報告》提到嗰個公務員學院，開放畀對公共行政有興趣嘅人報讀，睇來公務員職位都係繼續爭崩頭。

公務員學院究竟會起喺邊？

　　講時講，公務員學院選址，政府一直都話已找到合適地點，但遲遲唔肯講起喺邊，CK今日都畀人問到口啞啞......Ann姐就提議將學院起喺大嶼山或者離島，提供時間較長嘅課程。Jenny一聽即時諗起細個嗰啲集訓宿營......唔係掛!?好彩CK回應返Ann姐，當局要考慮公務員嘅交通方便，方便培訓之後可以返返崗位工作。真係替小妹一班響政府任職嘅朋友仔，同埋就來入職嘅師弟妹捏一把汗！