今日立法會繼續審「一地兩檢」，雖然大主席梁君彥一早講明只預留36個鐘搞掂剩低嘅立法程序，二讀都只係會畀8個鐘大家辯論。不過噚日委員會主席葉劉讀完份報告之後，作為「一地兩檢關注組」召集人陳淑莊就梗係爭做第一個發言喇！佢發完言之後就即刻提出要將草案中止待續，所以去到今日中午左右先表決到個中止待續，而二讀嘅剩餘時間都仲有大約7個鐘。

Ann姐鬧民主黨又要帶高鐵團又要反一地兩檢

　　建制派都清楚今次任務係要快快手通過個議案，所以繼續齊齊唔出聲，由得你班民主派自己噏。不過今朝民建聯蔣麗芸（Ann姐）就似乎發掘到「新大陸」，都要㩒個掣發吓炮先得！雖然㩒咗掣發言，但係都仲要輪候發言，Ann姐似乎等唔切喇！佢直接出嚟記者區，同行家們開心Share佢嘅新發現！

　　原來佢個議員辦事處上星期六就搞咗個內地團，點知喺深圳撞正民主黨佢哋都搞內地團！Ann姐就嬲嬲地咁同大家講，「嗱！呢啲白鴿招牌認得啦！佢哋搞高鐵團，上內地！」但轉個頭又喺議會反對一地兩檢，直斥民主派係「做一套講一套」、「講就天下無敵，做就有心無力」！

阿尹聽完滴汗：咩Logic？

　　之但係反對一地兩檢，就唔可以搞內地團啦咩？Jenny就表示唔係好理解到Ann姐嘅諗法喇！而無故被鬧埋一份嘅民主黨尹兆堅（阿尹）都滴晒汗，不過佢都「以德報怨」，話想送本書畀Ann姐，呢本書就叫《邏輯謬誤鑑識班》！

　　阿尹話，Ann姐嘅講法至少犯咗兩個邏輯謬誤，一個係「不同類對比」，用兩樣唔同嘅嘢拉埋一齊嚟比較：「我哋係反對緊喺香港西九龍站進行一地兩檢，我哋冇話要拆咗香港或者中國個高鐵，冇話過中國唔可以行高鐵」、「我哋講咗如果一地兩檢喺福田搞就唔反對呀嘛！原來我哋講咗成大半年，佢（Ann姐）都唔知人哋講緊乜㗎？」佢重申又重申，民主派反對喺西九做一地兩檢是因為不希望違反《基本法》，「係福田搞係冇問題㗎嘛！所以喺內地搭高鐵又有咩問題呢」？

　　阿尹話Ann姐犯咗第二個錯誤就係「錯誤因果推論」。佢話，如果反對香港高鐵一地兩檢，係咪就代表要反對晒成個中國嘅高鐵，從而唔應該搭高鐵呢？「唔係㗎嘛！」佢仲爆Seed話頂唔順建制派一而再再而三，甚至三而四都係咁：「又唔識又唔聽人講，人哋個原因係乜、反建議係乜，你都唔知，咁你想點呢？」所以想送本書畀Ann姐咁話喎！睇嚟阿尹今次真係著著哋，不過如果自己重覆咗成年嘅嘢，到而家仲係畀人誤會曲解，又真係好難唔火嘅！Jenny表示呢啲花生好好食呀！