上個星期講到羅范椒芬冇得同科技園續約，「被逼分手」；今個星期又有另一位人士唔同政府續約嘅新消息噃！原來係申訴專員劉燕卿（Connie）都證實咗下年約滿之後唔會續約，不過同羅范個情況唔同，Connie就話係因為想要多啲時間照顧屋企（Need more time to look after my family），所以先唔續約啫！羅范冇得續約，Connie就唔想續約，林鄭身邊又少一名女將喇！好比大台冇咗香香啊！

Connie唔續任，有唔少人都感覺好惋惜！

Connie人緣好 辦事效率高

　　申訴專員公署其實成立咗29年，而申訴專員嘅任期係5年，Connie都已經係第5位申訴專員喇！其實Connie一畢業就係做消委會，一做就做咗38年，（而家仲有冇人一份工打38年咁長時間呢？）由研究主任做到去總幹事，退任兩年之後獲委任做申訴專員。

　　不過因為之前幾位專員都係政府、立法局出身，喺政府都叫有返咁上下人脈，所以Connie上任初期都被人質疑冇喺政府部門做嘢嘅經驗，處理起關政府部門事嘅投訴時會唔會難入手。不過而家Connie唔續任，有唔少人都感覺好惋惜！Jenny都係其中一個！事關Connie一直對行家好好，亦都唔會收埋收埋，加上佢做過唔少主動調查都備受好評，唔知係唔係因為佢唔係政府出身，反而冇官僚嗰種包袱，做起事上嚟可以更加爽手呢？Jenny真係好想Connie回心轉意，一係休息一排之後重出江湖吖！