（晴報相片）

　　朋輩都因香港社會的撕裂而變得壁壘分明：

　　「好嘢！佔領遍地開花，抗議者不回家！」撐佔中者壯語豪情。

　　「亂作一團，唉！香港這個家！」反佔中者唏噓悲情。

　　這公民抗命與社會安寧的二分對立，已蔓延至香港每一個階層。在民生經濟這層次，影響已明顯浮現。

　　銅鑼灣舖頭老闆哭喪著臉:「我間舖頭仔百幾萬租，而家D貨攤係度，好似D抗議群眾咁，齊齊曬太陽，我已經流血不止咧！你遍地開花，我就坐定等瓜！」

　　「嘿！國慶煙花取消咗，幾冇癮，如果跑馬都取消埋，我一定同佢地死過！」伙計肉緊地說。

　　於是好多人都問:「佔中，點收科？」

　　這個億萬question，我知就應該有諾貝爾和平獎啦！

　　明知不可為而為，打電話問D高人。

　　「結果？梁振英落台囉！」好意先生不假思索回答。

　　「論據呢？」

　　「梁振英係典型庚日出生嘅人，眉粗、有殺氣、聰明。佢利用習近平嘅剛強，使出鐵腕政策。佢用人大來做擋箭牌。」

　　「後面咁嘈，你係邊？」

　　「佔緊中囉！」

　　「車！」原來有主觀意願。

　　「撇開政治立場，中肯D講下局勢。」我要求。

　　「大局不好，恐有損傷，是個僵局。我舊年寫咗啦，新曆9月尾10月都唔好嘛，你冇睇咩？而家唔得閒同你講啦！要唱愛自由呀。」

　　電聯另一高人。

　　「新曆9月7日至10月8日，有流年的五黃、流月的二黑飛到特首辦公室，前者是災星，後者是病符。這方向正是政府總部的西北，屬乾位，乾代表首長、權力。近年此位附近動得很厲害，曾有解放軍大樓翻新，有一陣子還掛了紅燈，另在其西北起了摩天輪，動到抽筋。」

　　「咁現在亂局幾時可以收拾呢？」

　　「過咗10月9日可能好D，因為二黑走了。但立冬至大雪之間，即11月7日至12月7日又有九紫到臨，火生土亦助旺五黃。」

　　「你好似有嘢做緊？」我覺得其聲音透露他並非全神貫注。

　　「我執緊行李。」

　　「o下!你走佬!時局唔係咁差掛！」

　　「唔係著草，係遊地中海D島。半年前定咗。」

　　「你都走得幾著時噃。」

　　「我心在郵輪，心繫香港嘅。」

　　都唔知希望佢地嘅預言靈好定唔靈好！

　　(此文寫於國慶日，午夜即有數百名示威人士包圍特首辦。)