《小傳日記》iPhone都有得租？蘋果美國新招化解加價衝擊兼吸納果粉！

　　《小傳日記》而家手機愈賣愈貴，高端旗艦機售價往往去到五位數字（港元），而最近存儲晶片不斷加價，買手機更加要精打細算！蘋果為咗挽回一眾預算唔高嘅果粉，決定喺花旗國聯同金融科技公司Klarna合作推出新計劃Apple Upgrade，消費者可以透過每月付費取得裝置使用權，合約到期後可選擇升級新主機、買斷原有產品，又或將裝置交還蘋果。方案涵蓋iPhone、iPad、Mac及Apple Watch，其中iPhone入門版租賃月費最低只需17.99美元（折合141港元），17Pro月租31.99美元（折合250港元）。iPhone同Apple Watch提供12個月及24個月租期，iPad與Mac就可以選擇24個月或36個月。

　　你可能會問，Apple Upgrade同傳統分期付款有咩差異？好問題，答案係差別不大。以iPhone17 Pro為例，24個月租計，月費31.99美元計埋兩年都係6000蚊港紙，而呢部機最低容量版本都要賣成9400蚊，平咗3000蚊，但係會失去產品所有權。依過往做法，好多果粉買完新機後會即刻放售原本二手機，減去兩年約60%折舊，實際持有成本其實又真係唔差得去邊。

　　如果要講差別，應該係在於消費者支付嘅係蘋果產品嘅使用費，而非取得某一款產品嘅所有權，不過呢個措施就會衍生一個問題，如果用家部機用得太殘，蘋果會唔會拒絕收回，要求用家買斷？要留意租賃計劃係唔會提供Apple Care保險，而還機時裝置亦要符合一定狀況，果粉為咗順利換新機就一定要錫住部機嚟用！

　　點解蘋果喺呢個時候要推出租賃計劃？嚟嚟去去都係錢作怪。由於全球出現記憶體晶片荒，導致晶片價格成本急升，蘋果多款產品都有加價壓力，但加價又可能影響銷量。試諗下，而家新機價值1萬銀鬆D，未來貴多一兩千，收入水平唔高嘅果粉就真係要諗諗先，不過如果將加幅分攤到12個月或24個月，條數拆細咗，可能就冇噉直觀，消費者較容易接受，既可以維持銷量，又可以轉移成本，仲可以將消費者留喺蘋果生態鏈添，請請！


*編者按:本欄搜羅即日熱傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者請運用個人思考能力自行作出投資，如因相關建議，如與因相關建議書而相關。