經常有人話做炒飯，一定要用隔夜冷飯才做到？但大家又無諗過，酒家或茶餐廳每天要賣出炒飯款式，哪裡找來隔夜飯？用隔夜飯的用意，係因為飯夠乾身，炒出來才一粒粒，不會黐埋一舊。

　　其實只要煲飯時，水份較平日煲飯不要放太多水去煲，煲好後打開電飯煲蓋，讓白飯吹涼才去炒，就可以較容易炒出一粒粒的炒飯。今期食譜做法雖然簡單，但如果個炒飯底炒得好，隨時加入叉燒、蝦仁等材料，就可以變化成一碟美味的楊州炒飯啦！大家不妨試下！

烹煮時間：5分鐘

份量：2人

材料：

　　白飯   2碗

　　雞蛋   1個 + 蛋黃 2個

　　蔥粒   適量 （隨意） 

調味料：

　　鹽  適量

做法：

　　1. 雞蛋及蛋黃拂勻，備用。

　　2. 燒熱鑊落少許油，下白飯用鑊剷將飯壓散。（鑊一定要燒熱保持高溫）

　　3. 將蛋液加入炒飯內快速炒勻，要將每一粒飯包入蛋汁，最後加入蔥粒及少許鹽調味，即成。

韋太小貼士：

　　如想每粒白飯都能包到蛋液，可以先將蛋加入白飯內拌勻才去炒。