2018年就快過去，大家今年印象最深刻嘅係咩呢？Jenny表示最記得嘅就係颱風山竹襲港啦！連當時貼嘅交叉膠紙痕都仲留喺個窗到添！而今日Google就公布咗「2018年度搜尋排行榜」，「山竹」果然登上「熱爆本地頭條」第一位，不過可惜嘅係「熱爆關鍵字」就唔夠某套話題電視劇fight啦！但係Jenny就喺個榜嘅另一個表到睇到個「驚喜」嘅名，就係之前獲「鳳袍加身」嘅商經局常秘利敏貞登上咗「熱爆本地話題人物」第4位，僅次於律政司司長鄭若驊咋！

大家掛唔掛住佢呀？

齊來回帶賀賀利常秘 

　　咁值得慶祝嘅事，Jenny梗係要同大家回帶賀一賀佢啦！睇返佢嗰套紅綠花花「鳳袍」，2018年最佳服裝造型獎真係非佢莫屬！可惜嘅係Google個榜冇呢個排名......不過Jenny記得當時利常秘嘅「玉照」一出，即惹來一眾網民蜂擁改圖，連身邊一同出場嘅商經局局長邱騰華都被佢嘅光芒掩蓋！

　　不過衣著咁有創意嘅利常秘本身就係做通訊及創意產業科，合晒合尺！但係佢喺「鳳袍加身」幾個月之後，就調咗去做工商及旅遊科，之後就唔多見利常秘嘅Fashion照喇！相信一眾網民同Jenny都一樣咁掛住佢呀！