返工帶飯抑或跟大隊外出食，是不少打工仔的迷思。有港男訴說返工食飯壓力大，他指帶飯怕被同事品評飯餸，外出食又嫌貴，形容比南北韓問題更難拆局！有人力顧問指，跟同事吃飯有助拉近關係，建議即使帶飯，也可偶爾參與。

　　事主自稱家住北區，在九龍區返工，他指為慳錢帶飯也不易，除了重又怕飯菜變味，還要面對同事的閒言。「返到去要畀其他同事評價你兜飯，口痕友會寸你點解唔出去食」。但跟同事出去食，也不由他自主，擔心餐餐消費50元以上吃不消；若捱麵包又自覺太慘；試過與女同事出街食，「啲女仔好鍾意話幫佢畀住先，餐後毫無意識回水」，因此形容返工食飯也很大壓力。

　　有過來人指以前常帶飯，部分同事見好餸就偷食，不好時就取笑「做乜咁慳，唔同佢哋出街食」，令他有感不如「自己食好過」。另有網民指事主「食餐飯都咁多嘢諗」，認為他小題大做，又指食飯是個人選擇，只要跟同事保持良好關係便可。

80後跟大圍 帶飯返工

　　80後Queenie指屋企是無飯家庭，加入新公司後發現同事「幾乎個個帶飯」，她也跟隨文化。「前一晚整定簡單三文治或炒飯，就算無時間整飯盒，都會買外賣回去跟同事一起食，免得變孤獨精」。

　　基督教家庭服務中心盈力僱員服務顧問培訓顧問黃錦翔指，是否跟同事飯聚，未必是影響職場人際關係主因。「反而或因事主跟同事關係一般，社交能力較弱，就算被邀飯聚也傾向疏遠。」

飯盒被品評　可幽默應對

　　他續指，是否帶飯因個人經濟及健康等左右。「就算未能常跟同事食飯，也可在其他時候，如茶水間閒聊及放工後一起活動，拉近關係。」但他說為免予人感覺「完全不出席」，建議一周可抽一次參與。

　　至於飯盒被人品評，香港基督教女青年會青年就業服務督導主任林遠濠說，事主應調整心態，幽默回應，勿太上心。「例如說『下次你(斬餸)加料』、『呢排儲錢』等」。他又指同事可能想打開話題，惟部分青年以為別人嘲笑他，嚇到別人也不敢開玩笑。