《魚缸博客》三頭馬車不過不失，南戈壁上季收入增速加快吼得過！

　　三頭馬車數據今日(15日)公布，阿爺國慶前一連串政策成效今日終於出爐，三頭馬車之中10月社會消費品零售按年增4.8%，大勝預期嘅3.8%，都總算對得起上海嗰5億人仔消費券。今朝魚缸氣氛都尚算唔錯，中特估都普遍造好，博客今日就吼中隻南戈壁(01878)。

　　南戈壁公布截至9月第三季純利1003.9萬美元，按年跌65.8%；但期內收入就按年升46.7%至1.44億美元。而截至頭三季，純利按年轉虧為盈賺2020.6萬美元，期內收入就多31.2%至3.19億美元，反映第三季收入增速係有所提升。

　　今日魚缸翻兜中特估，南戈壁又有業績支持，短期內阿爺都有望出力保5，煤炭股低位都應該開始有啲關注度。不過南戈壁今朝半日已大升超過兩成半，如果而家吼入的確好似蝕底啲。有興趣入手大可等回落至3.1至3.25銀附近入手，短線睇吓有無機會破到兼企穩牛熊線位大約3.55銀，周線企得穩就不妨加倉，中線上望6銀目標。

《編者按》本欄搜羅即市傳聞，惟消息未經證實，《經濟通》亦不保證內容之準確性。