按盤價 
《小傳日記》魚缸連跌四日，埋單今個禮拜唔見差唔多成千點，個個都望回吐，今個禮拜就
跌足四日畀你睇。今日繼續係全面回吐，僅有個別一兩個板塊係升，但論跌嚟講，今日藥股都無
乜壞消息，但就被隻康方（０９９２６）累全家。
今朝康方忽然急瀉，一成、兩成、三成咁失禁式下跌，最多試過大跌四成半。頻能咗成朝，
後尾先發現原本上面又有消息話康方其中一隻新藥臨床表現不似預期，一個消息就令呢隻龍頭藥
股暴跌。
直到大約中午，先再有內媒報道提到原來今日美國臨床腫瘤學會發布年會摘要，而康方旗下
醫非小細胞肺癌嘅ＡＫ１１２，亦即係今日傳聞嘅主角，都會喺呢份年會摘要入面公布結果。而
中午康方都趁機發通告，公司自主研發的全球首創雙特異性抗體新藥「依沃西注射液」，亦即係
ＡＫ１１２，已經獲國家藥監局批准上市。而且都有報道搵到康方方面回應，年會摘要入面已經
公布ＡＫ１１２嘅「無進展生存期」結果理想，並唔係流傳所講嘅低於預期，而今次結果亦將會
隨大會６月１號正式向全球發表。
下晝市有通告加持下，康方跌幅大幅收窄，但最終都係要跌兩成二，未成功收復返條牛熊線
。回顧返全日，明顯今朝條消息就係流料，睇返近期康方嘅沽空數據，今個星期二（２１號）同
尋日（２３號）嘅沽空比率急升，分別達到１８﹒８７％同１６﹒２９％，都創咗４月底以來新
高，到今日就有一條流料令股價急瀉超過四成，淡友應該已經乘著早兩日嘅沽空豬籠入水。
過往都唔係無藥股因為臨床研究撻Ｑ而捱沽，但今次係針對大價嘅康方，用一條流料就成功
打殘股價，反映醫藥對於消息嘅敏感度係極高，更不限於大價定細價股。以過往藥明系嘅經驗嚟
睇，消息通一不離二，淡友成功一次就好容易會再有下一次，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
WoW WoW星期三：健康網購產品低至$99 (只限今天) ► 火速行動
