《魚缸博客》中央推「以舊換新」，重汽最興奮，股價仲有無得上？

　　《魚缸博客》港股近日低處未算低，噚日更一度跌穿萬七關，見三個月低位。搞到散戶無曬
心機，又話五窮六絕七翻身？可能因為五月翻身翻得太多，搞到之後六窮七絕。正當大家都關注
緊今次浪底會跌到咩位時，內地突然出政策，支持設備更新和消費品以舊換新，刺激今日港股止
跌回升。
　　國家發改委和財政部通知，統籌安排大約３０００億人仔超長期特別國債資金，加力支持大
規模設備更新同消費品以舊換新，受惠嘅除咗家電之外仲有汽車。私家車有補貼已經唔係新鮮事
，過往已有先例。但商用車以舊換新就係首次，因此大出市場預料之外。其中報廢並更新購置符
合條件的貨車，平均每輛車補貼８萬元人仔；無報廢只更新購置符合條件嘅貨車，平均每輛車補
貼３﹒５萬元人仔；提前報廢老舊營運類柴油貨車，平均每輛車補貼３萬元人仔。
　　中國重汽（０３８０８）主力生產重型卡車，自然係今次受惠企業。所以，今日股價一度飆
升一成四，暫時股價最高升至２０﹒２銀。即使今日股價大升，市盈率都不過９﹒５倍，周息率
仲有近５﹒３厘，牌面睇唔太差。不過，睇返技術走勢圖。重汽股價喺２０２３年九月尾低位５
銀，開始展開一波升浪。今年四月高見２２銀，年幾升咗３倍有凸。就算今次股價可以上返四月
高位２２銀，但同今日股價相差只得一成左右，吸唔吸引見仁見智。
　　睇返上周一（１５日）股價走勢，重汽發盈喜料中期按年多賺４５％，當日股價同樣飆近一
成三，不過，收市升幅收窄至５﹒２％。今日會唔會故事重演，博客唔敢講。但博客一向唔興高
追，尤其係中期盈喜已經發咗，政策利好消息又出咗。如果買入，仲可以博啲乜？所以，唯有望
門興嘆，羡慕嗰啲低位入咗貨嘅投資者。不過，重汽息口有５厘幾，對一啲鍾情收息股嘅投資者
來講，可能仲有吸引力。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。