《魚缸博客》SpaceX上市在即，據聞一拆五每股低至105.32美元方便散戶進場？

　　真係史上最大型新股IPO，SpaceX 據報最快6月12日係美國上市，6月4日路演，6月11日定價。

　　而原本Space X每股公允市場價值從526.59美元，公司就宣布將股份「一拆五」，降至105.32美元，股價拆細方便散戶進場。

　　據報今次SpaceX IPO料集資750億美元，相當於估值可達1.75萬億至2萬億美元。馬斯克最新表示，IPO後也不會出售任何SpaceX股票。

　　其實市場一早有得提早炒作，博客留意到有隻加密貨幣係同SpaceX掛勾，叫SpaceX tokenized stock (PreStocks) ，而家已經炒上到793.38美元，相信呢個價錢係未進行一拆五，拆左就大約係158.676美元左右。

　　香港呢邊，除非你係美國公民，或者係機構投資者、高淨值客戶（據聞好似要十萬美金起跳入場），否則你都係只能夠用半新股模式入場。有留意開博客寫股票，都知道未來係炒三個概念：太空、能源、AI。

　　目前太空概念股真係寥寥可數，因為真正掌握到上太空技術嘅人都唔多，而香港呢邊同太空科技相關，都係得衛星製造、火箭發射燃料，都未係直接相關太空股。博客就覺得，有閒錢咪入小小，擺十年，或者以月供方式，每個月出糧買一兩股擺係到，都係一個唔錯的投資選項！
　　

《編者按》本欄搜羅即市傳聞，惟消息未經證實，《經濟通》亦不保證內容之準確性。