《魚缸博客》證監出聲警告保薦人，過完年新股未見有聲氣？

　　過完年，博客好奇睇下有咩新股抽下，打開個APPS一望，喂師傅，入面得隻ETF可以抽，波叔又話咩香港好多新股排緊隊上市，又話香港樓市股市「大洋蔥」（大陽春），初四到而家開工咁多日，點解新股裏面可以甚麼也沒有嘅呢？

　　博客就記起呢一兩個月新聞，第一單，就係證監會打開口牌，話你地班保薦人做事「俹簁」，其中不點名詳列14個保薦人操守不達標的案例，講到明你班友「唔熟書」，招股階段流程混亂　。博客聽聞，有大行搵有港牌內地人做香港IPO，因為唔熟文化同流程，所以做壞晒規矩，最後證監會先出聲警告。

　　第二單，就係早前《彭博》有報道指，香港負責上市嘅BANKER嚴重不足，因為之前IPO水靜河飛，所以做開嘅BANKER一早移晒民去搵食；去年突然湧一大堆公司上市，一個人要負責十幾單，真係有時候內容都睇唔切，簽個名由佢上市就算。

　　兩單夾埋睇，其實你就不難明白，因為上市唔夠人做嘢，而同時證監會又出聲，所以大家都要放慢手腳，唔可以再咁「蒙著眼（簽名）說上市」，所以博客估計到，今年新股上市速度會慢慢開始減慢，起碼等多返小小人係香港開工，處理下上市文件先啦。

　　話返兩頭，其實新股抽到抽唔到，對博客關係不大，因為呢一年來博客入飛都起碼二三十次，但都係中得四五隻，改晒制度之後根本散戶就玩唔到，哎。

《編者按》本欄搜羅即市傳聞，惟消息未經證實，《經濟通》亦不保證內容之準確性。