《魚缸博客》唔反制就唔再加關稅，中方會唔會真係唔反制？

　　關稅日終於來臨，但特朗普就稱之為解放日，係美國由不對等關稅解放嘅日子，但就係其他國家大鑊嘅日子。但畢竟特朗普都吹咗風好一段時間，今日關稅登場之後整體都係預期之內，暫時未再提到會進一步提高，令到今日縱然係跌市但都跌幅有限，今朝恒指低開500幾點，但放lunch前就跌唔夠400點。

　　今次特朗普對中國加徵34%額外關稅，前後稅率高達54%。但即使係咁，魚缸今朝可能一早已經反映咗，令到市底強勁而出現唔係好跌得落嘅情況，甚至美團(03690)同小米(01810)都跌唔多甚至倒升，就知港股近期真係強。

　　而睇關稅落地之後，普遍美國方面言論都傾向溫和，特朗普直頭係一啖砂糖一啖屎嘅典範，一方面重收54%關稅，但另一方面又話非常尊重國家主席，打你一槌然後又快又呵返咁樣。而特朗普幕僚都維持一致口徑，美國財長貝森特就講明，叫各國「切勿報復」，話只要對方唔反制，目前的稅率就會係最高水平。

　　所以到而家就要睇返各國真係點反應，唔同國家都開始有唔同反應。其中加拿大已經表明會反制，但都有唔少國家語氣比較溫和，好似日本咁，雖然話「遺憾」，但只係「敦促美國豁免」。至於中國方面暫時傾向係後者，商務部回應對關稅「堅決反對」，「將堅決採取反制措施」，但隨後都係「敦促美方」，睇落未似會進行大規模兼重手嘅反制，可能呢點都係支撐今日市況嘅原因之一，所以後續中方嘅回應更加值得關注。

《編者按》本欄搜羅即市傳聞，惟消息未經證實，《經濟通》亦不保證內容之準確性。